قذائف بنكيران المسمومة في حق مزوار: منين جبتي الرجلة وما نرضاش بك وما فيداكش وانت وزير سقاطة

زنقة 20

أنا ما نرضاش بك

«لو كانت الظروف بحال قبل نقدر نفرح ليك نكول حتى انت غادي تدوز شي أيام كوزير أول وتبقى الدولة تتعاونك حتى تدوز المرحلة. ولكن اليوم لا.. الدستور الجديد تيكلف رئيس الحكومة بمسؤوليات جديدة وهو اللي تيعين المسؤولين وخاصو يكون مسؤول وكاينة ظروف سياسية جديدة كاينة دول سقطت أنظمتها وكاين ارتباك وكاين انتظار في الشارع. اليوم المعقول أسي مزوار. لا أنت ولا الناس اللي كيدفعوك أنا كنكول ليكم راكم غالطين بعدو من هاذ الإنتخابات ماشي فصالحكم.. حنا ايلا دزتو بطريقة نزيهة وشفافة أنا غا نقولها ليك من دابا هنيئا لك، ولكن ما تعولش عليا نكون معاك في الحكومة ديالك، ما تصلاحش ليا رئيس الحكومة، ما نرضاش ماشي في المستوى.. ايلا كنا حنا في رئاسة الحكومة وبغيتي تولي وزير يمكن نفكر.. هذا ماشي مشكل وزير ممكن، رئيس الحكومة ما يمكنش ليك.. ما عندكش القدرة السياسية وما عندكش الإمكانيات باش تقول هاذ الكلام، وانا متأكد أن الناس لي قالوا ليك هاذ الكلام وصلاتهم احصائيات الناس لي قالوا ليك هاذ الكلام وشجعوك باش تقول هاذ الهضرة تخلعوا الناس. لي قالوا هاذ الكلام شافوا العدالة والتنمية كيفاش كيتجاوب معاه المجتمع وكيفاش الأمين العام ديالو تيدخل بالمحبة ديال الجماهير وتيخرج بالمحبة ديال الجماهير، وشافوا باللي ناس غادي يصوتوا للعدالة والتنمية وقالوا ليك قول هاذ الشي باش الرأي العام الدولي يغير الموقف ديالو، ولكن انا باغي نقول ليك حنايا ما بانينش على الرأي العام الدولي، ما بانينش على الفلوس، غدا يجيني الخبار باللي سي مزوار جامع في واحد الأوطيل 1200 من رجال الأعمال، هذا استغلال للنفوذ، لأن وزير المالية كيملك الملفات ديال الضرائب ومن الطبيعي يتخوفوا منو وبزاف وغادي يجيو لو بزز منهم.. وقول ليا باش غادي يقوم عليهم بالإنفاق وياكلو ويشربوا في فندق كبير.. هو اللي ما عندوش الحق يفوت 35 مليون في الحملة ديالو يشرح ليا كيفاش غادي يدير.. واش السيد رئيس الحكومة يبدا بالمخالفات في الإنتخابات من الآن، هذه هي الحكومة التي تعدوننا بها حتى وإن نجحتم فلن تنجحوا.. لن تذهبوا بعيدا».
تصريح بنكيران ضد مزوار في لقاء حزبي في نونبر 2011


انت وزير سقاطة

هاذ الشعب وعى، هاذ الشعب ما بقاش كيخاف من المفسدين ومن المشوشين اللي اليوم كيتعرضوا لي، واحد الله يهديه كنحترموه وكيترأس واحد الحزب وهو ما كان عندو علاقة لا برئاسة ولا بسيدي.. قال يجب الإسراع بالتخلص من حكومة بنكيران، إيلا كانت أخويا بيديك عنداك تخليها دقيقة واحدة تزيد حيدها من دابا، هذه حكومة شكلت بإرادة المواطنين، وها الشعب هاهو حاضر أنا أتحداك أسي فلان، أنا ما بغيتش نذكر سميتك نظرا للتقدير اللي كندي ليلك، أجي لوجدة وجمع هاذ الناس بلا فلوس، تيكولو هاذ الحكومة كتخلق عدم الثقة عند الأجانب، علاش هاذ الكلام، بالعكس اليوم نشوفو الدول اللي زاروني والمؤسسات الدولية ونشوفو الإحصائيات ونشوفو التقييمات ديال المؤسسات الدولية، اليوم بدات تتأسس ثقة حقيقية على ناس ما كيظهرش بلي كيكذبو عليهم ولا كيديرو ليهم واحد التوجيهة، الثقافة ديال التوجيهة انتهت.. أنا منين كيجي عندي مسؤول خارجي كنكول ليه الحقيقة وتنكول ليه أشنو عوالين نديرو وتنوضح لو الأمور. وتيبان لي والله أعلم أنه كيخرج ثايق بهاذ الحكومة وعوال يشجع المستثمرين ديالو باش يجيو. وأنتم اللي كتحاولو تخلقوا عدم الثقة في المغرب وأنتم اللي درتو تصرفات غير لائقة ديال السقاطة، أنا ما باغيش نعيب على شي واحد خذا شي حاجة غير يشرح لينا كيفاش خذا بهاذيك الطريقة، بغيتي تاخذ انت وزير خذ عندك الحق، بغيتي تاخذ بحال هادوك اللي خداو قبل منك ولكن ما تعطيش لواحد الموظف معاك يوقع ليك واش ما يبقاش فيك؟ هاذ الشي كنعتبروه غير سقاطة.. انا ما كنبغيش نجبدكم ما تجبدونيش.
بنكيران يرد على تعويضات مزوار وبنسودة في شتنبر 2012

اسمح ليا ما فيداكش

بغيت نكول لسي مزوار.. اسمح لي سي مزوار ما يبقاش فيك الحال، كيف غادي تدير انت حتى يثيقوا المغاربة باللي غادي يجيهوم الجديد معاك، ياك غير لبارح المغاربة ماكانوش عارفينك، واش غادي ينساو المغاربة كيفاش حتى وليتي رئيس ديال الحزب ديالك، لوكان بقا سي المنصوري نكولو بعدا، المنصوري يا سي مزوار حيدو ليك الياس العماري باش تولي انت أمين عام ديال الأحرار، لأن سي المنصوري رفض باش يسمع ويطيع لإلياس العماري والهمة أكثر من القياس، فمنين غادي تجيب اليوم الاستقلالية ديال القرار ومنين غادي تجيب القوة باش تحمل مسؤوليتك يلا كنت رئيس الحكومة وتوقف في وجه التعليمات اللي غادي تجيك من الناس اللي كيداعيو القرب من المحيط الملكي..آش هاذ القوة.. ولهذا ما عندكش هاذ القوة وأنا أعتقد رغم كل المكر والخداع اللي خدامين عليه الناس اللي كيعتبرو أنفسهم كيملكوا يتصرفوا بهذا الأساليب ديال المقالب وباللي بيها غادي يحلو المشاكل ديال البلاد ، كنكول ليك يلا قبلتي باش تدخل من خلال هذه الأساليب ..دابا كيحيدو المرشحين القدماء ديال البام ويعطيوهم ليك ، وهاذ الشي راه عامرة بيه الصحافة وتيساعدوك ولكن انت غدا اللي غادي تحمل امام الله ثم أمام هاذ الشعب المسؤولية وخاصك تكون قادر باش تؤدي الحساب وأنا كنكول ليك اسمح ليا ما فيداكش.
المشكل ديال المغرب أسي مزوار ماشي مشكل فقط ديال الميزانية، ماشي مشكل ديال الأرقام، وماشي مشكل ديال نسبة النمو، المشكل ديال المغرب هو مشكل سياسي، خاصو حكومة مسؤولة، كتصرف في الصلاحيات اللي عطاها الدستور وقادرة باش تحكم هاذ المغاربة وتكول لي عندو الحق عندك الحق وتعطيه لو واللي ما عندوش الحق تكول ليه ماعندكش الحق وتوقف في وجهه.. شكون ما بغا يكون.. يلا مكنتيش قادر تدير هاذ الشي أنا كنصحك ماتزيدش تورط، لأنه شحال ما تورطتي غادي يصعاب عليك باش تخرج. ومعي الأثمنة الخاصة بسوق الجملة ديال السبت.
تصريح بنكيران في لقاء لحزب العدالة والتنمية بسلا في نونبر 2011

فاتك الغرس قبل المرس أسي مزوار

أنا باغي نقول ليك أسي مزوار قالك العدالة والتنمية بغا يردنا لور، إيوا إيلا كان هاذ الشي لي جبتوه لينا هو القدام فعلا أنا باغي نردكم لاور وقال ليهم بغا يدير لينا في المغرب بحال أردوغان واش حنا دولة علمانية؟ ايلا قلنا دولة اسلامية تيقول ليك بغاو العلمانية. الناس قالوا احنا كنشبهو لأردوغان تيقول ليك حنا دولة علمانية قولوا لينا غير أش بغيتو تحت الله لي تيقولو المراكشيين.. اسمع أنا نقول ليكم أسي مزوار واليوم أش قال، قال ما غاديش نخليو العدالة والتنمية يفوز لأنه حنا ماشي بحال تونس وماشي بحال مصر حنا عندنا الديمقراطية.
واش نسيتي باللي في 2002 جينا حنا الثالثين وفتناك أسي مزوار، واش نسيتي بأنه في 2007 جينا حنا الثانيين وفتناك أسي مزوار.. كيفاش ملي نجحوا هادوك اللي كيشبهو لينا وعندهم اللحيوات قصورين بحال دياولنا ودايرين الحجاب مع عيالاتهم حتى هوما؟ كيفاش بغيتي دابا عاد تجي تفوتنا حتا جات الديمقراطية عاد باغي تفوت العدالة والتنمية.. فاتك الغرس قبل المرس أسي مزوار، وهاذ الكلام ماشي ديالك وما تقدرش تقولوا انتايا.. هاذ الكلام قيل لك أن تقوله وأنا نقول ليك واحد القضية واخا ينجحوك نهار 25 نونبر ما راكش قاد باش تواجه المغاربة وتواجه 20 فبراير وتواجه المعطلين وتحل المشاكل ديال المغرب.. ما راكش قاد وما غا تقدرش.
تصريح عبد الإله بنكيران في تجمع لحزبه في نونبر 2011

منين جاب مزوار الرجلة

جابوه للحزب وهاذ الحزب تطلق ليه اللسان هاذ ليامات، علاش تطلق ليه اللسان، كيدار حتى تطلق ليه اللسان، منين جاب هاذ الرجلة.. أول البارحة قدم لمكناس فقال لهم عبد الإله غير حلايقي.. شوف أنا يلا كنت حلايقي جابتني الجماهير بطريقة ديمقراطية ماشي إلياس العماري اللي جابو، اللهم حلايقي وجيت بذراعي وبالمحبة ديال الإخوان ديالي والأصوات ديالهم على مشهد ومرأى ومسمع من الناس ولا نحيدو ليك مصطفى المنصوري اللي رفض يفك الارتباط ديالو بحزب العدالة والتنمية ونجيبوك انت اليوم باش تكول لينا عبد الإله بنكيران.. انت غير جابوك.. انت ما كنتيش في الحياة السياسية.. انت ماشي زعيم وما يمكنش ليك تولي زعيم بين عشية وضحاها.. إيلا بغيتي تستمر في الدور اللي كتلعبو كركوز تيحركوك من الوراء هاذ الشي اللي كاين.
تصريح عبد الإله بنكيران ضد وزير المالية صلاح الدين مزوار في نونبر 2011

أنت مهزوز سياسيا

صاحبنا سي مزوار لبارح كان جامع شي ألف واحد من رجال الأعمال فواحد البلاصا في الدار البيضاء سمتيها paradise، شوف غير السمية ديالها كيف دايرة: البارادي Paradis .. حنا جينا للقاعة المغطاة الحمد لله ماكاين لا عشاء.. لا بوز كافي Pause café.. ناشفين أكثر من القياس، أرا نكول ليكم واحد الصحافية تكلمت معاي في التلفون كالت ليا راه مزوار ها أش تيكول فيك.. هو هاذ ليامات قال لرويترز حنا ماشي بحال تونس ومصر، ماغاديش نخليو الإسلاميين يوصلو للسلطة، إوا شوف ليك دابا، واش في يديك أنت القرار ولا هاذا الكلام تقال ليك. وانا قلت لها قولي ليه قال ليك عبد الإله بنكيران أنت مهزوز سياسيا ولولا أن الذين وعدوك بانك ستكون رئيس الحكومة لم يعد بإمكانهم أن يوفوا لك لما قلت هذا الكلام ، قالت لي هي هزات يديها وطلبت الكلمة قالت ليه بغيت نكول ليك شي كلمة قالها ليك سي عبد الإله بنكيران واش يمكن ليا نكولها، هي قالت ليه قال ليك عبد الإله بنكيران أنت مهزوز سياسيا والقاعة تقلبت وجاو ليها البلطجية ديالو ومنعوها من الكلام وحيدو ليها المكروفون ومارسوا عليها الضغط بالقول ارحل.. ارحل وتيقولو ليها كلام.. وهي تبارك الله عليها تجبرت مغربية قحة بالحجاب وبلا حجاب ورفضت الخروج، شكون لي قال لي هاذ الشي كال لي هاذ الشي واحد السيد في العائلة ضرب ليا التلفون وقال ليا واحد السيدة ناضت كتكول كذا وكذا وفهمنا بأنه ما كاين لا ديمقراطية ولا والو، لا حقوق الإنسان، لاحرية التعبير، هاذ السيد هذا أ الإخوان ما عندي حتى شي حاجة ضده هو رجل لطيف، ولايني لطيف يلا بغا يولي وزير نشوفو، رئيس الحكومة ما فيدوش، ما يمكنلوش، ما عندوش الجرأة، كال ليك دابا غادي يقدر يوقف في وجه المستشارين كلهم كيفاش؟ أنت عارف شكون لي جابك عارف شكون لي طيح سي المنصوري، عارف بلي جاو حيدو ليك رئاسة البرلمان وحيدو ليك رئاسة المستشارين ومع ذلك كتحالف معهم وتدافع عليهم ودور في العدالة والتنمية، علاه صحاب ليك العدالة والتنمية حيط قصير؟ عنداك تغلط عنداك تثق بالناس اللي كيوهمو فيك وكيعطوك واحد النصر ساهل.. ما تنساش باللي جامع المعتصم وهو رمز مسيرين الجماعات الشرفاء وبقاو عليه بالمؤامرات حتى وضعوه في السجن وما كملات 38 يوم حتى خرج معززا مكرما.. وبعد أربعة أيام كان بجوار جلالة الملك في المجلس الإقتصادي والإجتماعي.. هذا راه العدالة والتنمية أخويا.. بعدو منو الله يجازيكم بخير، سيروا قلبوا على شي واحد آخر، هذا الإخوان يوم 25 نونبر هو يوم الحسم، يوم الإنتصار الحقيقي ماشي ديال جوج ثلاثة، ديال المغرب خاصنا نجيو حنا اللولين إن شاء الله ونكونو الحكومة.
تصريح بنكيران بث على اليوتويوب في 10 دجنبر 2011